(Matadoru 3 Agustu 2017)
Dader malirin, la hamalirin ami isin
Loro matan roman, la nabilan ba ami
Nakukun hafalun, halerik- mata ween
Iha loron ne’en fulan Setembru tinan 1999
Tan, asu -fuik ho nia besi si’ak
Asu-fuik ho nia besi naruk
Ataka Igreja Ave Maria Suai
Besik si’ak tarutu iha rai fohon no tetuk
Besi naruk haborus ami isin
Raan, ami raan mak sulin
Ami halerik ho klamar laek, iha asu-fuik le’et
Mata-ween sulin ho raan no ruin
Raan hadulas iha didin sagradu nian
Raan nasulin iha ilas sagradu nian
Raan....raan... Maubere ...raan..raan Nai lulik
Asu-fuik ho nia Besi si’ak
Hakotu ami iis
Ami mehi la hakotu
Asu-fuik ho nia besi naruk
Tetak hakotu kakorok
Hakotu liman
Tetak dadain ami isin
Ami fuan, la hakotu
Ami isin la hetan
Ruin la hetan, tan, soe ami iha fatin ne’ebé la’ós ami nian
Klamar sei la maten
Klamar hakilar iha foho Taroman tutun“MATE KA MORIS UKUN RASIK-AAN”
Roman-Liberdade sei la haksumik iha surat tahan mutin
Raan sulin Maubere modi makerek “TIMOR-LESTE KAER RASIK KUDA TALIN”
Roman liberdade rohan-laek ba povu Maubere.
Hakerek Nain: Carlito Taroman
