(Matadouru, 15 Setembru 2018)
Kriatura moris
Fuan senti, isin hamaluk
Isin maus, fuan habelit
Domin halolo isin tan hadomi
Senti murak tan hafurak
Domin nafunan buras
Domin halolo isin
Domin sai ran. Ran sai isin
Isin husi ita nia isin
Ran mós husi ita nia ran
Fulan sia iha knotak
Dada is moris husi ita
AMA.... APA.....
Tansa la haksolok ho ha’u?
Hodi……….hakotu ha’u is
Subar ha’u isin !
Soe ha’u isin !
Iha fatin be la’os ha’u nian
Tan, Ama-Apa la hanoin
Ha’u halerik ho tanis
Tan, AMA-APA la senti
Anin fuík lori ha’u semo
Balada fuík hadau ha’u isin
Hakotu ha’u isin, tolan ha’u isin
Tan, Apa-Ama la hadomi
Ha’u kbi’it la iha
Hafalun ha’u isin ho hena malae
Hakesi kakorok ho tali mutin
Fitar sai ran. Ran sulin iha rai leten
Halo ema hotu halerik
Tan sulin iha fatin bé la’os ha’u nian
Husik bá...... ha’u hi’it ain tuir ha’u le’ut
Istória moruk ha’u nian sei haktuir iha lalehan
Haktuir mós iha imi hotu nia moris
La bele haktuir ha’u nia le’ut ba anju sira seluk
Ha’u klamar si’ak no sei hakilar
Ba domin mate klamar.
Hakerek Nain: Carlito Taroman
