Dalaruma lakon esperansa
Dalaruma lakon haksolok
Dalaruma lakon hakarak
Hirak ne’e hotu tan biban be la to’o
Tansá ó husik fuan ne’e tanis
Tansá ó halo liman ne’e tane
Tansá ó halakon hanoin
Tansá ó hadiuk tilun ne’e la rona
Tansá mós ó hadelek matan ne’e
Bainhira hateke do’ok
Ó halo ó nia aan
Hamirik firme iha laletek
Hodi tetu tun mai rai tetuk
Hodi ukun forsa tomak
Maske iha lian haksesuk
Katak tansá ó nune’e
Ó ukun ho forsa tomak
Tansá ó la rona lian seluk hato’o
Ó….ó mak ida ne’ebé nunka atu rona
Nunka fo oportunidade hato’o
Nunka fo konsiderasaun
Nunka fó valór ba ema nia expresaun
Ó halo ó nia aan
Sai matenek liu hotu
Hodi haluhan ó nia dever
Nu’udar fatin atu simu no fó
Ó mak ukun bo’ot ne’ebé la merese atu ukun
Ó mak ukun bo’ot ne’ebé la folin atu valorize
Basá ó nia matenek no loko-aan
Halo ó sai delek hodi halo ó nia aan sai indixiplinadu
Hosi Cipriano da Cruz
Maloa, 09-03-2022
